Kua tīmata te mahi tauira whakahaere a Te Pūkenga

News

Kua tīmata te mahi tauira whakahaere a Te Pūkenga

Hakihea 16, 2020 | 15 min read

I ngā wiki ruarua kua taha ake kua whakapau kaha Te Pūkenga me EY ki te whakatakoto me te whakarite i te tukanga hoahoa ngātahi. Ko te tukanga ia e pūtake mai ana i te whakaaro arahanga ā-hoahoa, mā reira e mātua whakarite kia whai wāhi mai ko te hunga koia ka pāngia e ngā huanga nei, ki te wānanga, te whakamātau me te whakatau hoki.

Mai i Noema, i te wā i whakataungia ko EY rāua ko EY (Tahi) hei hoa mahitahi me Te Pūkenga ki te whakarite i te whanaketanga o tā mātou tauira whakahaere, tērā te tīma e pukumahi ana ki te whakamahere i ngā mahi, arā, te tirotiro he pēhea e whakatinana ai i tēnei kaupapa whakaumu nui whakahirahira, ngā wātaka mō tēnei mai, me ngā āhuatanga me mātua raranga haere ki te tukanga kia tika, kia tūturu te hoahoa ngātahi, te aronga me te wānanga tahi. Ko ngā whāinga matua o tēnei kaupapa hoahoa ngātahi, ko te tuku i tētahi mahere, hei kaupapa pakihi tōna rite, e whakaatu ana he pēhea e whakaumu ai a Te Pūkenga i te whakaako, e waihanga ai hoki i tētahi pūnaha mātauranga ahumahinga whakahonohono, mauroa tonu hei whakapai ake i te hauora o ngā tāngata katoa o Aotearoa, hei tautoko hoki i te ōhanga tipu hei painga mō te katoa.

Arā kē ngā mahi whakamahere a te tīma whāiti  i ngā wiki ruarua kua taha ake, kia noho mārama ai rātou ki ngā mahi hei mahi, he pēhea e mahia ai, ā, ko te mea nui, hei āwhea mahia ai.

“Ko tēnei kaupapa, he kaupapa nui rawa, matatini rawa hoki. He tika kia whai wā mātou ki te āta whakamahere i ngā mahi kia mahia atu i tēnei wā, ā, tae rā anō ki te wā ka tāpaehia te kaupapa pakihi mō te whakaumutanga ki te Minita ā tērā tau. Kua tū tō mātou tīma whāiti, e noho ana i runga whakaaro kotahi me whai tātou i te huarahi e whakaata ana i te mana, te whakapapa hoki o tēnei kaupapa anō,” te kī a Merran Davise, te kaiwhakahaere mātāmuri i Te Pūkenga mō te kaupapa whakaumutanga, whakawhitinga hoki, ā, ko ia hoki te māngai tautoko o te mahi tauira whakahaere.

Kāore tēnei tauira whakahaere e waihangatia mā ngā ākonga, engari me mātua waihanga tahingia me ngā ākonga, koia tētahi wāhanga tino whaitake o tēnei tukanga katoa. Inā te nui, te matatini o te mātātaki, arā, kia pohewa anō i te whakaaakoranga o te pūnaha mātauranga ahumahinga me te whakangungu, me tūturu rawa te whakahoatanga me te mahi ngātahi, ka tika. Mā tēnei mātātaki anō e whai kaha ai tātou ki te mahitahi ki te whakaara, te whakamātau i ngā whakaaro auaha, hou kia hua, kia puta te panoni mauroa tonu e hiahiatia ana mō ngā pūnaha me ngā ratonga kua toka kē.

Kie te waihanga mātou i tētahi anga e taea ai te te aronga hoahoa ngātahi kia tipu, kia whanake te huatau, me tētahi tukanga whakamātautau, whakatikatika pakari e hāpai ana. Kei te mōhio hoki mātou me whakarite wā e mahitahi ai mātou me ngā hoa, e whakawhiti kōrero ai me ngā kaiwhaipānga hei whakamātau anō, hei whakamana hoki i ō mātou whakaaro, ā, kātahi mātou ka whakarite wā kia whānui, kia hōhonu te whakawhiti kōrero ā-motu hei whakaū, hei whakatau hoki i ngā whakaaro whakamutunga.

Hei reira, ka mōhio pū mātou ko te tauira whakahaere ka whakaaturia ki te Minita ko te huanga tērā o te haerenga ngātahi tika, whai wāhitanga pono,” te kī a Merran.  

Te āhua o te hoahoa ngātahi  

Ko te hoahoa ngātahi he wāhanga nō te whakapuakanga whakaaro arahanga hoahoa . Ko te mea rerekē, ka neke atu te tukanga hoahoa ngātahi i te āhua o te mahitahi, ki tērā o te mana ōrite. Mō tēnei kaupapa, ko te tikanga o te mana ōrite e pā ana ki ngā whakatau mō te hoahoa i waenga i Te Pūkenga me ōna hoa Te Tiriti.

Kei te whakatūhia tētahi rōpū iti, rōpū hoahoa ngātahi, ā, hei ngā marama mātāmua o 2021 ka tīmata tana mahi. E 20 pea ngā tāngata o tēnei rōpū mai i ngā momo ākonga kua tīpakohia i runga i tā rātou whaikoha ki te mahi mō te kaupapa Ko te Ākonga te Pūtake, he tāngata hoki ēnei i whai wāhi tonu ki te kaupapa o Te Whakaoreore i te Ao Hou, me ētahi atu tāngata whaiwhakaaro motuhake i tonohia kia whai tirohanga kē te rōpū nei. He kaha hoki te whai wāhitanga o te Māori ki te rōpū hoahoa ngātahi. Ka tautokohia te rōpū mā te whakamahia o te rangahau, o ngā kitenga kia whanake ai he whakaaro hei kawe i te mahi a ngā hoahoa tuatahi. Ka mahi kanohi-ki-te-kanohi, ka mahi mariko hoki.

Kei taha atu o te rōpū hoahoa ngātahi, ko ētahi rōpū tohutohu, hei tautoko hoki i te tukanga whakatipu whakaaro. Kei ēnei rōpū tohutohu te hunga whakamātau, whakaata hoki mō te rōpū hoahoa ngātahi. Ka tuku whakaaro, huatau, kōrero hoki hei āwhina. Ka rite tonu te whakawhitiwhiti whakaaro, kōrero hoki o ngā taha e rua. I tēnei wā kei te tautohua, kei te whakaritea ngā rōpū tohutohu. Ka tīmata ā ratou mahi ā te marama o Pepuere 2021, ko te nuinga o ā rātou mahi ka kawea marikohia.

Ka haere ngā mahi a te rōpū hoahoa ngātahi me ngā rōpū tohutohu mai i te Pepuere tae atu ki Mei 2021 pea.

Arā anō ngā aramahi kua tīmata kē, e tuku rangahau, kitenga hoki ki te rōpū hoahoa ngātahi, mā rātou e whakamahi i roto i tukanga whakatipu whakaaro. Ko ngā kitenga mai i kaupapa Ko te Ākonga te Pūtake tērā, ko ngā mahi a Te Pae Tawhiti tērā, arā ngā kitenga kei te whakakaongia mō te wheako kaitukumahi me te whakawhitinga o ngā ITO.

Ko tētahi puna kōrero hei tirotiro mā te rōpū hoahoa ngātahi ko ngā rangahau, ngā kitenga me ngā kōrero whakahoki i kohikohia i runga i te haerenga o te whakahoutanga o te mātautanga ahumahinga, me ngā kōrero whakahoki anō a ngā hoa me ngā kaiwhaipānga i roto i te kaupapa a Te Whakaoreore i Te Ao Hou.

Te rārangi wā mō tēnei mahi

E toru ngā wāhanga motuhake, he wāhanga e honohono ana o te kaupapa tauira whakahaere, arā:

Te tauira whakahaere

  • He tukanga hoahoa ngātahi, whakaanga, whakawhiti kōrero e tau ai he aha tā Te Pūkenga, mō wai rā, he pēhea e mahi ai, ki hea e mahi ai.

Te Mahere Rautaki Pūnaha Mōhiohio (ISSP)

  • Māna e waihangatia ai tētahi mahere rautaki pūnaha mōhiohio hei tautoko i te tauira whakahaere.

Te kaupapa pakihi

  • Ka tukua ki te Minita kia whakaaetia, ka whakatakoto i ngā pūtea e hiahiatia ana ki te hāpai i te tauira whakahaere, ka whakatakoto hoki he pēhea e whakaritea ai te tauira whakahaere.  

Kua tīmata kē ngā mahi hei takatū, hei whakamahere i tēnei kaupapa, heoi ā ngā marama mātāmua o 2021 ka tīmata ngā mahi ake, ā, ka haere ngātahi mō te roanga o te tau ki tōna mutunga.

Kei te kōkirihia te mahi ISSP e te tīma o Te Pūkenga rāua ko EY, me te mahitahi ki tā te kōtuinga hapori CIO, ā, hei waenganui o 2021 tēnei ka whakatauhia.

Kia mārō te haere o te mahi hoahoa ngātahi, kātahi ka tīmata te mahi mō te kaupapa pakihi, ā, ko te tuatahi o ngā whāinga he tuhinga hukihuki tutahi me tuku ā te marama o Hepetema, me te kaupapa pakihi whakamutunga me rite hei te mutunga o te tau 2021 ki te tāpae ki te Minita.

Timeline for operating model

Tukuiho he pdf

Ka taea te wehewehe i ngā mahi mō te tauira whakahaere ki ōna wehenga e toru. Arā:

Te Hoahoa Ngātahi ka mahitahi te rōpū hoahoa ngātahi me ngā rōpū tohutohu ka tautohu, ka whakaniko, ka whakawhāiti i te ‘raru’ hei whakatau ngātahi mā rātou, kātahi ka whakaara, ka whakatipu whakaaro rātou, ka whakamātau, ka whakaniko i ngā whakaaro, ka whakaoti whakatau, e waihanga ai i te ‘rongoā’ mō te raru i tautohua. Ka takoto tēnei ‘rongoā’ hei papa mō te mahi hoahoa tuatahi. Ko tēnei mahi ka takoto hei papa mō te hoahoa ariā tuatahi, ā, ka oti mai i mua i te marama o Hune.

Te Whakaanga. Kei te whanakehia tonuhia te huarahi whakaanga, ā, ka takoto ēnei mātāpono e whai ake nei hei papa:

  • Kia mātua whai wāhi mai ngā tāngata katoa, kia rangona ai ō rātou reo
  • Kia maha ngā hui kanohi ki te kanohi ki ngā wāhi maha huri noa te motu me te whakaanga tuihono hei tautoko mai
  • kia mōhio ehara mā te wāhanga whakaanga hei whakatau, engari māna hei whakamātautau, hei whakatikatika tonu i ngā whakaaro hoahoa kei te ariā hoahoa tuatahi
  • kia mārama, kia pono te āhua o te whakaanga hei whakanui i ngā hiahia o ngā hoa me ngā kaiwhaipānga katoa.

Ko te hiahia ia, ka kawea ngā mahi o tēnei wāhanga i te marama o Hune.

Te whakawhiti kōrero. Ka whakamahia ngā mōhiohio me ngā kōrero whakahoki ka puta ake i te wāhanga whakaanga hei waihanga ariā tauira whakahaere hukihuki. Kātahi ka whakaritea he tukanga whakawhiti kōrero ā-motu mō te ariā tauira whakahaere hukihuki. Tērā pea ka whakahaere tuihonotia te nuinga o tēnei mahi, engari kāore anō kia tino whakatau ngā whakarite. Ko. Te whakaaro i tēnei wā, ka haere te whakawhiti kōrero ōkawa i ngā marama o Hepetema me Oketopa 2021.

Ngā rā matua

  • Tihema 2020. Ka tū te hui tuatahi mō te wheako kaitukumahi. Ka tū ētahi hui anō ā te tau 2021.
  • I mua i te mutunga o 2021: Ka whakapā atu ki te rōpū hoahoa ngātahi, ka tuku whakamārama hoki he pēhea e whai wāhi rātou ki te tukanga hoahoa ngātahi
  • Hei ngā wiki mātāmua o 2021: Ka whakapā atu ki te nuinga o ngā rōpūtohutohu, ka tuku whakamārama hoki he pēhea e whai wāhi ai rātou ki te tukanga hoahoa ngātahi
  • Pepuere 2021: Ko te hui tuatahi o te rōpū hoahoa, he wānanga kanohi-ki-te-kanohi. Kua whakatūria ngā rōpū tohutohu, ā, e tūhono ana mā te pūhara tuihono.
  • Mutunga o Mei/Hune 2021: Kua oti ngā mahi a te rōpū hoahoa ngātahi me ngā rōpū tohutohu, arā, kua tautohua te ‘raru’, kua mahitahi ki te whakatau rongoā, kua whanakehia te arīa hoahoa tuatahi
  • Hune/Hūrae 2021: Ka whakahaeretia te whakawhiti kōrero whānui ā-motu mō te arīa hoahoa tuatahi
  • Hūrae.Akuhata 2021: Ka whakamahia ngā kōrero whakahoki mai ngā mahi whakaanga, ka whakawhanake ai i te ariā tauira whakahaere hukihuki
  • Atu i Hepetema 2021: Te whakawhiti kōrero, whakaaro ā-motu mō te ariā tauira whakahaere hukihuki
  • I mua i te mutunga o 2021: Ka whakaritea te tauira whakahaere whakamutunga, ka tāpaetia ai hei kaupapa pakihi ki te Minita ka whakatakoto he kōrero mō ngā pūtea hei hāpai i te tauira whakahaere, ka whakatakoto hoki i te āhua o ngā mahi hei whakatinana i te tauira whakahaere.  

Ka piritahi tonu Te Pūkenga ki ōna hoa Te Tiriti mō te roanga o tēnei tukanga, e mātua e tauwhiro ai, kia mau ai hoki tēnei hononga.

“Kei te tino hiamo ahau i te mea kua tīmata tēnei mahi nui. Ko tēnei haerenga o tātou he mea nui whakahirahira, ka riro māna e panoni ai te ao māturanga matua. Koinā tā mātou arotahi mō 2021. Ka tino rerekē te ao o āpōpō ki ō naianei ao. He rite tēnei ki te kōtuku rerenga tahi, kia pohewa anō i te mātauranga ahumahinga me te whakangungu mā te āhua o te whakaako. Ahakoa te hiamo, te wehi, ka tāku e hiahia nei, kia haere mai te rā, te wā e tīmata ana tātou ki te mahitahi, ki te hoahoa ngātahi i te ao o āpōpō,” te kī a Merran.