Kua tau, kua rite te tīma kaiarataki a Te Pūkenga

I ngā rā mātāmua o Noema, i pōwhiritia ngā kaiwhakahaere matua tuarua e ono ki te pūtahi hou, hei whakaoti mai i te tīma kaiarataki.

Te Pukenga DCEs

I pōwhiritia e Heamana Murray Strong rāua ko te Kaiwhakahaere Mātāmua Stephen Town ngā kaiwhakahaere matua tuarua e ono ki Te Pūkenga i ngā rā mātamua o Noema. Ko rātou, ko ngā DCE hou me Stephen, ka whakaoti i te tīma kaiarataki, ā, kua tahuri tonu atu ki te mahi nui mā rātou hei kawe.

“Tino harikoa ana au nā te taunga mai o ngā DCE e ono ki Te Pūkenga. He mea nui kia tika ngā tāngata hei kaiarataki, ā. kei runga i ō rātou pakihiwi te pikinga te hekenga rānei o te whakahaere. Kua tau mai ēnei tāngata me ā rātou kete pūkenga, kī rawa ki ngā tautōhito me ngā mātauranga rerekē, whānui hoki ki te whakahaere hou nei ka hangā tahitia e mātou,” te kī a Stephen.

“He kaupapa nui whakahirahira tēnei mahi, ā, kia tōtika te hanga i tētahi whakahaere e noho whakahīhī ai tātou katoa.

“E whakapono ana au mā tātou tahi me te whakapau kaha i roto i ngā tau kei te tū mai ki te ārataki i te rāngai ki te pohewa anō i mātauranga ahumahinga me te whakangungu. Ko mātou te kaituku mātauranga matua nui rawa o Aotearoa, nā konei me whakatutuki rawa e te whakaumutanga kōtuinga ngā hiahia rerekē o ngā ākonga, ngā kaitukumahi, ngā ahumahi me ngā hapori katoa,” hei tā Stephen.

Koia nei nngā DCE e ono:

Ana Morrison – DCE Mana Ōrite
Tania Winslade – DCE Tā te Ākonga Haerenga, Wheako hoki
Warwick Quinn – DCE Tā te Kaitukumahi Haerenga, Wheako hoki
Dr Angela Beaton – DCE Tukunga me te Pūmātauranga
Merran Davis – DCE Te Whakaumu me te Whakawhitinga
Vaughan Payne – DCE Ngā Whakahaerenga
I tū te pōwhiri ki te marae o Wintec, arā, Te Kōpū Mānia Kirikiriroa, ā, i reira i whai wā ngā DCE e ono ki te whakapuaki i ō rātou whakaaro mō te mahi e haere ake nei..

I kī a Merran, mōna e haere ngātahi ana te mataku me te hiamo. “Me kī, kua kā te ahi ki te puku, ā, he aroha ki tōku ngākau mō tēnei mahi. E tino whakapono ana au ko tēnei haerenga he mea tika mō Aotearoa, Mēnā ka tika ā mātou mahi, ka puta ngā hua,” tana kī.

Kei te anga whakamua ki te whakaanga ki te kōtuinga whānui. “Nā te whakatūhanga o Te Pūkenga, arā kē ngā huarahi kia mahi tahi tātou, mā tō tātou nui, rahi ka āhei ai tātou ki te whakakaha i te kounga me te whānuitanga o te tuku mātauranga huri noa te motu, kia hua ake te ōritetanga o ngā otinga,” tana kī. “Kei te ngākaunui au kia tutuki i ngā huarahi ako ngā hiahia o ngā ākonga katoa, ahakoa kei te kura, te wāhi mahi, te ipuranga rānei e ako ana.

E mōhio ana a Vaughan ki tā te mātauranga hei whakamana i te tangata. “Ko au tētahi kua whai painga nui i te mātauranga. E kaha whakapono ana au me mātua whai pūnaha mātauranga ia tangata o Aotearoa e pūawai ai rātou, e rite ai ō rātou hiahia,” tana kī. “E hiamo ana au i taku whai wāhi ki tēnei kōtuinga kura tangata, ka whakapau kaha ki te tutuki i ngā hua pai i roto i te mātauranga ahumahinga.”

E harikoa ana, e hiamo ana hoki a Warwick i tana whai wāhi ki te haerenga whakaumu nei. “Kia kaha, kia māia tātou ki te pohewa ana i te iho o te mātauranga ahumahinga me te whakangungu kia nui ngā hua o tēnei kaupapa nui kei a tātou. Ina ngā akoranga e tukua ana i ngā akomanga me ngā wāhi whakangungu i ia rā, engari kia maumahara tonu tātou, he akomanga anō ia wēne me tētahi arawhata kei tōna tuanui, ia whare miraka kau, ia wharekai hoki. Me whai kia hīkoi tahi tātou me ngā kaitukumahi i tēnei haerenga,” hei ko tāna.

E ai ki a Tania nōna te whiwhi kia whaikoha ia ki te kaupapa o Te Pūkenga. “Kua kite au ki te painga o ngā hua o te mātauranga ka puta ki te ākonga, tōna whānau, me te hapori. Ko taku tūranga, he hoahoa he whakahaere i ngā wheako o ngā ākonga puta noa i Aotearoa e tau pai ana ki taku arotahi kia noho ko te oranga o ā tātou tāngata hei pūtake mō ā tātou mahi. Koina hei karawhiu i aku mahi,” tana kī.

I kōrero a Ana mō ana mahi o mua hei rōia mō ngā take Tiriti, ā, ki ōna whakaaro anō he tīmatanga, he otinga hoki, tēnei taunga ōna ki Te Pūkenga, ka riro mā e arotahi ki ngā hononga me te ōritetanga. Kei te mataku, kei te hiamo hoki i tēnei huarahi hou. Heoi e ngākaunui ana au ki te whiwhi ōritetanga a te Māori hei whāinga tōmua mō tēnei whakaunutanga pūnaha. Ka whakaoioi, ka mahitahi hoki i ngā wā me ngā wāhi e tika ana kia tutuki ai taua whāinga,” tana kī.

I pōwhiritia hoki a Keri-Anne Tane, ko ia tērā kua haere mai i tana tūranga o te Kaiwhakahaere mō te Tangata me te Ahurea i Toi Oho Mai.