Te mahi tahi puta noa i te kōtuituinga

Kua mahi paheko tētahi tīma mai i te kōtuituinga whānui kia eke ngā wawata mō Te Ākonga te Pūtake tuatahi.

Four learners in front of laptops talking

Kua mārō te haere o te whakaūnga o Te Pūkenga kia whakatairangatia he pūnaha ahumahinga piritahi, ko ngā ākonga kei te pūtake. He tino mahinga whai hua te wāhanga tuatahi o te tuitui a Te Ākonga te Pūtake, ā, he tini ngā whakaaro, ngā kōrero me ngā ariā i whakaputaina hei whakahiato mā mātou. I takea mai tēnei whāinga hua i te mahi nui o ngā kaimahi pono i ngā pekanga me ngā Whakahaere Whakangungu Ahumahi Tauwhirowhiro, i mahi tahi me te tīma rangahau o Te Pukenga kia whakatāhuhutia te mahi nui kia eke ki ngā taumata.

I whakatūria e te tīma rangahau o Te Ākonga te Pūtake ētāhi rōpū arotahi iti me ētahi atu ngohe awheawhe nui atu, he mea whakatū ā-kanohi, ā-ipurangi hoki i te katoa o ngā rohe o te motu, tōna tatanga nei, me te tautoko mai a ngā takiwā katoa o te motu. Kua oti i te rōpū tōna whāinga tuatahi te whakatinana, arā, te kohi urupare mai i tētahi rōpū ākonga matahuhua, te hunga tautoko i a rātou, arā, i tautokona ēnei mahi e ngā ākonga, e te hunga e whakangungutia ana, e ngā pia, e ngā kaimahi hoki.

Me matakitaki koutou i tēnei ataata poto nā Ara

Me mihi ka tika ki ngā mahi nui a ngā kaimahi i whai wāhi ki te hui kōtuituinga kia eke tēnei kaupapa ki tōna teitei. I noho rātou ki te hoahoa tahi i ngā ara tuitui i kawea ai e te tīma rangahau ki ia rohe, kia whai take ai mō tō rātou rohe motuhake, me ō rātou ākonga ahurei. Nā tēnei arotahitanga whai whakaaro i kawe te kaupapa ki tua rawa i ngā uauatanga, i tutuki pai ai ngā moemoeā.

“He whakamīharo te kōtuituinga,” ki tā Debbie Preston, Te Kaiārahi Pūmanawa o Te Pūkenga mō Te Ākonga te Pūtake. "Mehemea kāore rātou e tautoko mai, kua kore mātou e āhei ki te whakatū i tēnei rangahau, te pōwhiri rānei i ngā ākonga kia whai wāhi mai, kia rere rōnaki, kia rere tika rānei.   38 ō mātou tāngata mai i ngā pekanga me ngā Whakahaere Whakangungu Ahumahi Tauwhirowhiro i whakaingoatia e ō rātou Tumu Whakarae kia uru hei mema mō te hui kōtuituinga. Ki taku titiro i ngahau ratou ki tēnei huihuinga tūtaki tangata, me tēnei whāinga wāhi mō te ekenga taumata ākonga.

"E tino hiahia ana au ki te whakamoemiti ki ngā kaimahi i whai wāhi ki te hui kōtuituinga, ko koutou tērā i huihui i ō koutou kaha, i pāhekoheko, i whakaheke werawera i runga i te whakaaro kotahi kia puta ai he hua mō ā tātou ākonga i tēnei wā, haere ake nei."

I whai wāhi ngā momo tāngata i ngā ara mahi me ngā ao maha, ā, neke atu i te 1,300 ngā ākonga, te hunga e whakangungua ana, ngā pia, ngā kaiwhakangungu, ngā kaimahi tautoko me ngā kaitohutohu, ngā kaitukumahi, ngā mema hapori, ngā whānau mai i ngā pekanga, me ngā Whakahaere Whakangungu Ahumahi Tauwhirowhiro ki ngā awheawhe me ngā rōpū arotahi. I aronui ngā rōpū arotahi ki ngā ākonga i te pūnaha kāore i te tino eke āna mahi mō rātou (ngā ākonga Māori, Moana-nui-a-Kiwa, te hunga hauā, me te hunga tautoko i a rātou). Ka noho ngā putanga hei pūtake mō ngā kitenga rangahau. He maha ngā whakaaro i kohia i nga pēpa hāpiripiri, e kitea ai te huhua o ngā mahi whakamana tangata, aukati tangata hoki, ā, ka noho ēnei hei wāhanga noa o ngā  raraunga ka arotakea, ka whakahiatotia hoki hei tērā o ngā wāhanga mahi.  E ai ki a Debbie, "He matahuhua ngā rohe, ngā kanorautanga, te hunga kāore i te tino āwhinatia e tō nāianei pūnaha, te hunga he tika kia rerekē ngā taumata tautoko i a rātou e ako ana, me āta whiriwhiri ēnei mea katoa i te wāhanga hoahoa tahi o tō mātou tauira whakahaere - ehara i te mea kotahi anake te tauira mō te katoa.  E whakamoemiti ana mātou ki ngā tāngata katoa mai i te kōtuituinga whānui kē atu i tahuri ki te āwhina i a mātou i roto i tēnei mahi nui whakahirahira.  He nui ngā mea i ākona e mātou mai i ngā ākonga ngākau nui i tūtakina e mātou, me tō mātou hari mō tō rātou hihiri ki ā rātou mahi ako. Kua āwhina mai ngā momo tāngata i ngā taumata huhua o tō rātou huarahi i te ao nei, tēnei te whakamoemiti ki a koutou, me kore ake koutou e whakawātea nei i ā koutou kōrero ki a mātou, kua mōhio mātou ki ngā ara hōhonu e whāia nei e koutou, ngā mea e pā ana ki ā koutou me ngā akoranga.  

Ko te mahi nui i muri ko te tukatuka raraunga. E hia mano puka hāpiripiri mai i ngā awheawhe, me ngā whakapuaki matua 6,000 mai i ngā rōpū arotahi nā ngā ākonga i whakarite, mō te tautohu taupā, me ngā ara whakamahea i te tangata mō ngā putanga ako whai hua, nā konei kua pai tā mātou hīkoi ki te kawe i Te Ākonga te Pūtake.