Kua rangona ngā reo kaimahi i te terenga o Te Pūkenga

News

Kua rangona ngā reo kaimahi i te terenga o Te Pūkenga

Whiringa-ā-nuku 23, 2020 | 3 min read

Ko Aromātai Kaimahi he rapunga whakaaro kaimahi poto ka tukua auautia puta noa i te kōtuinga o Te Pūkenga. Ko te koronga ia kia rongo te Kaiwhahaere Mātāmua a Stephen Town, me te tīma kaiārahi, i ngā whakaaro o ngā kaimahi i a tātou e anga ngātahi atu ana ki ngā rā ki tua.

Ka kī ake a Stephen, “Ko te hiahia kia mārama mātou ki ngā whakaaro  o te hunga e mahi ana i roto i te kōtuinga i tēnei wā. He mea whaitake tonu ō rātou whakaaro tuatahi hei tautoko i te tīmataranga ki te hoahoa i te whakaumutanga o tā mātou rāngai.”

Mā Aromātai Kaimahi e whai mōhiotanga ai mātou i āianei, i ētahi wā auau hei ngā tau kei te tū mai ki ngā hiahia o te rāngai, ki ō rātou whakaaro, i te kauneke haere o te whakaumu nei. Neke atu i te 8,000 kaimahi puta noa i tā mātou kōtuinga āpitihanga, ā, he rerekē ō rātou wheako katoa. He mea nui kia whai wāhi rātou kia auau tonu te whakaputa i ō rātou whakaaro.”

“Ka tirotiro te tīma kaiārahi o Te Pūkenga i ngā whakaaro me ngā kaupapa matua ka puta ake i Aromātai Kaimahi hei āwhina i a mātou ki te whakaoti whakatau i te whakaumutanga a Te Pūkenga hei ngā tau e rua e tū mai nei. Ko te hiahia kia auau te rapunga whakaaro kia rongo ai mātou i ngā whakaaro o ngā kaimahi mō ngā panoni e kawea haeretia ana. Ka āhei hoki mātou ki te urupare ki ngā whakahokinga kōrero ahakoa nā wai, nō hea.

Kua kirimanatia e Te Pūkenga tētahi kamupene nō Aotearoa, arā ko AskYourTeam, mā rātou e whakarite Aromātai Kaimahi. I tuwhera te rapunga whakaaro tuatahi atu i Tūrei 27 Oketopa, ā, ka haere mō ngā wiki e rua.

Ko ngā kaupapa me ngā tikanga e hua mai ana i te rapunga whakaaro ka tuaringia me te kōtuinga o Te Pūkenga i mua i te mutunga o tēnei tau.

Atu i te tuku whakaaro mai mā Aromātai Kaimahi, ka whai huarahi tonu ngā kaimahi ki te whakaputa i ō rātou whakaaro i ngā toro whakaaturanga me ētahi mahi ā-rohe a Te Pūkenga.

“Kua tata mutu i au taku huinga whakaaturanga tuatahi huri noa te motu. He mea whaihua tonu kia kite, kia mārama ki te whānuitanga o ngā mea kei te mahia put anoa i te rāngai, ki te kōrero, whakarongo hoki ki ngā kaimahi. Ko te mea pai he nui ā rātou pātai mai.

Ka hua mai i ēnei hui awheawhe me te rapunga whakaaro he tirohanga tino whaihua ki ngā wāhi he pai te haere, me ngā wāhi e raru ana. He tikanga pai tēnei e hihiratia ai ngā mahi, ā, ka haere tonu tēnei matapakitanga.