Kia kaha ake te kitea o tā mātou Ara Whakawhiti

Tērā tētahi wāhanga hou i tā mātou paetukutuku – Tā Mātou Ara Whakawhiti – hei toko ake i te māramatanga ki ā mātou mahi.

Pathway and ferns

Kua whanakehia tā mātou Ara Whakawhiti hei āwhina i ngā tāngata katoa kia noho mārama ake ki te ara e whāia ana e Te Pūkenga i a mātou e hoahoa ngātahi nei i te āpōpō o te Ako Ahumahinga i Aotearoa.

He pai pea kia whakaahua pēneitia te Ara Whakawhiti, arā, ko te tōpūtanga o ngā aramahi e iwa kua whakaritea, ā, ka haere tonu ki te mutunga o te tau 2022. E ono ngā aramahi Whakawhitinga, me te Tauira Whakahaere, Ko te Ākonga te Pūtake me te Tukunga Pūmātauranga Auaha. E noho tahi ana me ēnei ko ngā aramahi Āheinga Matua me tā mātou Anga Kaitiakitanga, Noho Haepapa hoki.

Ko te hiahia ia kia tūhuratia te Ara Whakawhiti ka noho mārama ki koe ki ngā whāinga me ngā wāhanga arotahi o ia aramahi, o ia aramahi, me te kite anō hoki i ngā kōrero me ngā mahi hou e pā ana ki ia wāhanga mahi. Hei whakaata ngā taipitopito kei te paetukutuku he rerekē te rahi ngā aramahi e iwa tētahi ki tētahi, ā, ka rerekē hoki te āhua o te kauneke haere.

E whakamārama ana a Merran Davis DCE Whakaumutanga me te Whakawhitinga, “He mea nui ki Te Pukenga kia tuari noa ngā taipitopito me ngā kōrero hou mō ngā mahi a tā mātou Ara Whakawhiti. Ko te whai kia wātea ngā mōhiohio i runga i tā mātou pae tētahi tikanga e mārama ai ā mātou mahi ki te iwi whānui me te tuku kia whai wāhi mai rātou i a tātou e pohewa anō i te mātauranga ahumahinga i Aotearoa.

Ko tā mātou hiahia ina ka toro mai tētahi ki ēnei mōhiohio ka noho mārama ia ki ngā momo mahi kei te kawea haeretia me te kite hoki i te āhua ake o ia aramahi engari he mea kotahi tonu.”

Ka rite tonu te whakahoutia o Te Ara Whakawhiti kia paheko ai koe ki ngā kōrero kei te tuaringia, me tō mōhio e whai wāhi ana koe ki ngā mōhiohio hou i ngā wā katoa. Tirohia tā mātou Ara Whakawhiti.