He ākonga pūmau tonu

Ka kōrero a Tania Winslade DCE Te Haerenga me Te Wheako Ākonga, mō tāna ake haerenga, ōna wheako hoki.

Tania Winslade hero

Nō tēnei marama i tīmata a Tania (Ko Ngāti Awa te iwi. Ko Te Patuwai te hapū) ki Te Pūkenga. Kua mahi ia ki ngā rāngai maha, whenua maha hoki me ngā momo tāngata katoa. E rikarika ana ia kia whai hua āna mahi ki ngā ākonga katoa o Aotearoa kia taea e rātou ngā ara ki te angitu, me ngā wheako whakarangatira pērā i āna.

E kī ana a Tania, “Ahakoa kāore au i ahu mai i te rāngai mātauranga, kua whānui kē aku wheako i ngā tūranga kaiārahi e arotahi ana kia noho ora ai te Māori, otirā ngā tāngata katoa o Aotearoa, arā, i te ture tūmatanui, te kaupapa-here, te rautaki, te whanaketanga ohaoha, te kaitaiakitanga me te tutukitanga tangata, whakahaere hoki.

“Taketake ana, he ākonga pūmau tonu au, he whaiwhakaaro hoki ki ngā pūnaha. E kaingākau ana ki ngā otinga e hāngai ana ki te katoa, me te whakamārama i te tūhonohono o ngā wāhanga. He mea tino whaitake kia whai wāhi au ki te hoahoa i te pūnaha mātauranga ahumahinga hou mō tēnei whenua, ā, ka taku hiahia kia whaikoha au ki te pūnaha mātauranga ahumahinga he pai ake te whakaata i te whaihua me te tuakiri o ā mātou ākonga, ō rātou whānau, hapori hoki.

“He mea hira te kite i ngā pūmanawa o te rangatahi e puta mai ana i ngā ara ako. Nōu rātou anō te ao. Ko te wero nui ia ko te whai kia whakarite i ngā ara me ngā wheako e tino hāngai ana ki ngā ākonga, engari e kore e tutuki i te tangata kotahi pēnei i au. Mā te whaikoha o ngā wāhanga katoa e taea ai. Ka mahitahi mātou hei tīma kotahi, mā ngā tūranga, ngā mahi me ngā wāhi – he nui ake te kaupapa i tēnā, i tēnā wāhanga o te kōtuinga. Kia rite tā mātou tīma kia kawea ake tēnei mānuka, kei konei mātou ki te whaikoha ki tēnei kaupapa nui kaua ki te whakamahana tūru.

Arā te kaupapa o Te Pūkenga e whakaatu ana ehara tēnei i te tūranga mahi noa iho; he wāhanga nō taku haerenga whaiaro hoki. Mārama pai au ki ngā hua o te mātauranga nā ōku ake wheako, me ngā mahi i taea e au i tāwāhi. Kei te mārama hoki au ki ngā hua mauroa tērā ka puta ki te tangata mēnā ka ako ia i roto i tētahi taiao e whakamana ana i a ia. Nō rēira ka mana ehara ko te tangata takitahi,engari ko tōna whānau, hapori hoki. Kei whea mai tētahi kaupapa pai ake i tēnei, arā, te hoahoa i tētahi pūnaha mātauranga ahumahinga hei whakamana i ia ākonga me tōna katoa, kāore mō te whakataiapa i a ia. Koina te take kei konei au.

“Hei rōia whakatau tautohe arumoni, i whakapaua e au ngā tau e hia nei e mahi ana i tāwāhi. He mahi tērā e rangona whānuitia ai me te aha, i kawea au ki ētahi wāhi pārekareka – mai i Raipiria ki Pārihi. Heoi i koroingo tonu au kia pākaha tonu taku whai koha, engari kāore au i mōhio he aha kē tērā, heoi i mōhio tonu au me whai hua tonu ahau me aku mahi hei kura tangata anō. Nā tērā i ārahi i au i roto aku mahi, tae noa mai ki tēnei.

I au e mahi ana mō te NGO āwhina ā-ture i Kamapōtia e tautoko ana i ngā wāhine, ngā tamariki me ngā pārurenga hokohoko tāngata, i ako au i tētahi akoranga nui, arā ko te whakaiti. I reira i ako au i te hiranga o te whakamana i te tangata me ngā hapori kia whai oranga mō rātou anō, te mōhio hoki he tino taonga te āta whakarongo – kia kaua rā e uta i ō tikanga, whakaaro hoki ki runga i ētahi atu e anga whakamua ana.”

I tēnei wā kei Tāmaki Makaurau a Tania me tōna whānau e noho ana, ā, e tino ngākaunui ana rātou kia hūnuku ki Kirikiriroa ā te mutunga o te tau, ki ngā wāhi wātea, wāhi hou hei tāuhuratanga mō rātou, kia tata hoki ki ō rātou whanaunga.

I kī a Tania, “Nōku te waimarie kia tipu au i roto i tētahi whānau, hapori hoki me te whakapono ahakoa tō hiahia ka taea, ā, ko te manako ka āhei au ki te whakamahi i ōku pūkenga, wheako hoki hei painga mō ētahi atu. Kia hua ko Aotearoa e tōkeke ana, e ōrite ana te whiwhinga, e tipu mauri ora ai ā tātou tamariki katoa. Koira tāku, me taku kite ko te mātauranga he ara matua ki te āpōpō pai.