Kia whai reo te 70,000 kaimahi me ngā ākonga

E mahitahi ana mātou ko ngā kaimahi ko ngā ākonga ki te hanga tukanga pōti hei whakatū komiti tohutohu ki te Kaunihera ā-motu.

Workshop six post-it notes co creating a process

I te wā o ngā hui rapu whakaaro, whakawhiti kōrero mō te Whakahoutanga o te Mātauranga Ahumahinga, ko tētahi kaupapa he rite tonu te rangona ko te whakarite tukanga e whai reo ai ngā kaimahi me ngā ākonga.

He mea tino whaitake kia whakamana te NZIST i ngā kaimahi me ngā ākonga kia taea ai tana urupare atu ki ngā hiahia o ngā rohe katoa o Aotearoa me ā rātou nā ākonga, ahumahi, kaitukumahi, hapori hoki.

Kua tīmata kē ngā mahi hei whakarite tukanga e whai māngai ai ngā komiti kaimahi, komiti ākonga hoki ki runga i tā NZIST kaunihera ā-motu.

He mea nui whakaharahara kia rangona te reo o ngā kaimahi 10,000 (me te tīma ITO) me tōna 60,000 ākonga nō Aotearoa, mai i te tīmatanga nei, ka tika.

“Ko te kaha o te pūnaha mātauranga ahumahinga kei ōna tāngata – ā mātou kaimahi,” te kī a te Heamana Kaunihera a Murray Strong, “me ngā ākonga hoki, arā, ko tā mātou he whakarato i a rātou. He take nui tonu kia rongo te kaunihera mai i a rātou tonu kia tōtika ai te pūnaha mō āianei, mō āpōpō hoki.”

Te mahitahi ki te hanga tukanga pōti mō ngā komiti

I tērā marama i whakahaere hui mātou me ngā māngai mō ngā kaimahi, ngā ākonga me ngā uniana. Ko te arotahinga o aua hui ko te waihanga tahi i tētahi tukanga hei whai mā NZIST ki te whakatū komiti ā-motu, kia mātua whakarite hoki he pakari, he mauroa, he tuwhera hoki taua tukanga.

E ai ki te hunga i whai wāhi mai he pai aua hui, hei tīmatanga, ā, e pai ana hoki ki ngā uniana te huarahi kei te whāia e NZIST kia kaha ake te whai wāhitanga o tēnā, o tēnā.

“Ko te mahitahi te huarahi tika hei hanga komiti kaimahi,” te kī a Sandra Grey, te Kaiwhakahaere Matua o te Uniana Mātauranga Matua.

“Mārakerake ana te kitea kua mōhio kē tēnei hunga e tika ana kia ngāwari, kia urutau i ia rā, i ia rā. Kāore anō kia toka ō rātou whakaaro heoi ka mahitahi me ētahi atu ki te hanga i tētahi mea pai ake. Hei tohu tēnei i te kaha o te rāngai ki te ako, ki te tipu tonu.”

Ngākau pai ana a Ms Grey mō te huarahi kei te whāia e NZIST ki te whakarite i ngā komiti.

He mea tino whaitake kia whakakao mai i ngā pūkenga me ngā pūmanawa o roto i te NZIST kia nohotahi ki te kōrero tahi.

Kei te kohikohi mōhiotanga tonu mātou hei taonga whakaaro mō te tukanga. Ko te mahi e whai mai ana ko te whakarite he tukanga e rapu whakaaro ai mai i ngā kaimahi me ngā ākonga.

Me āta mahi tātou kia tika, kia hāngai te tukanga hei whakatū i ngā komiti, mō nāianei, mō āpōpō hoki. Heoi, e hiahia ana te Kaunihera ki te whakarongo ki ngā reo o ngā kaimahi me ngā ākonga. Mō tēnei wā ka whakaritea he wā mō ngā kaimahi me ngā uniana ākonga ki ia hui a te Kaunihera, kia taea e rātou te whakapuaki i ō rātou whakaaro me ā rātou take.

Tērā tonu pea ka tū ngā pōtitanga i mua i te paunga o te tau, ā, muri tata iho ka whakatūria ngā komiti mō ngā kaimahi mō ngā ākonga hoki.