Kei runga kē te TTP i ngā tatauranga mahi ā-motu

Kei te āwhina te kaupapa Whāngungu a Te Kuratini o Tai Poutini i ngā ākonga kia whai mahi.

Three learners smiling and looking at laptop

I mihi a Stephen Town, Kaiwhakahaere Mātāmua o Te Pūkenga ki Te Kuratini o Te Tai Poutini i tana taenga ki reira i nā tata nei. I kī ia, “Kātahi nei te rongo pai. Hei whakaatu tonu i ngā hua pai rawa ka puta i te mahitahi mō ngā ākonga. Ko te mahi a TTP me MSD i Mawhera he tohu o te whakapau kaha me te ngākaunui. Nā rātou i tino rerekē ngā hua mō tō rātou hapori, ngā kaitukumahi, ngā ākonga, ō rātou whānau me te ōhanga o tēnei wāhi, kei whea mai te rawe o ēnei mahi!”

Ko tēnei kaupapa 13 wiki o Whakangungu mō te Mahi e arotahi ana kia whai mahi ngā kiritaki MSD o tēnei takiwā. Ka tukua i runga i te whakaaetanga o MSD, me te ako i ngā pūkenga mō te tukanga uiui e whiwhi mahi ai tētahi, ngā tikanga mahi o te wāhi mahi, te whai tohu mātauranga tika e tutuki ai ngā ākonga i ō rātou whāinga.

Ka whai huarahi whakangungu te TTP kia aronui ki te ākonga, te nohotahi me ia ākonga kia mōhio ki ōna hiahia ake, mō tōna ara mahi, me pēhea hoki e tutuki ai ōna whāinga.

E kī ana a Annabell Dey Kaiwhakahaere Whakaakoranga TTP, ko tēnei huarahi manahau, aronui ki te ākonga e puta ai ngā hua pai rawa mō ngā tāngata.

“Ka uiuitia e mātou ngā tāngata katoa i tohua mai i mua i te tīmatanga ki TTP ki te matapaki i ō rātou pūkenga me te tohu i ngā matea whakangungu hei arotahi mā rātou. Ka whakarite hoki mātou kia ngāwari te whakaakoranga, me te arotahi kia rite rātou ki te uru tonu atu ki te mahi. Ka āwhina tonu ngā kaimahi TTP i ngā ākonga kia whai mahi rātou, ngā pūkenga me ngā mōhiotanga hei āwhina i a rātou i runga i tēnei haerenga.

“Ko te ākonga te tino kaupapa. Ka mahi tonu ā mātou kaimahi: ka mātua whakarite rātou kia tika ngā CV, ka mahitahi hoki me ia ākonga kia tutuki i a ia ngā tohu e tika ana (pērā i te Āwhina Tūroro, te raihana hautū waka rānei). He kanohi kitea ā mātou kaiako i roto i te hapori, ā, i ētahi wā, ka haere me te ākonga ki tōna uiui, ka āwhina rānei i a rātou ki toro ohorere i ngā kaitukumahi e pai ana. Ka mahi ngā kaiako me ngā ākonga ki te whakaoti mahere ara mahi e whakaata ana i ō rātou whāinga, ahakoa mō te whiwhi mahi, te whakapiki pūkenga rānei, e whai ara ai te ākonga kia whāia tonutia e ia.

“He rawe tonu te kite i ngā painga o tēnei whakaakoranga aronui ki te ākonga i ngā otinga. Mōhio tonu mātou ka tino whai hua  ā mātou mahi mō ngā ākonga nei, ā, ka kaha tonu mātou ki te āwhina i a rātou ki te whakatutuki i ō rātou whāinga.”