I te rā nei e pānuitia ana e te Poari Mātāmua o New Zealand Institute of Skills and Technology (te Poari Mātāmua) ngā kaiwhakahaere mō ngā poari o ngā Pūtahi Āpitihanga, Kuratini hoki (ITP), ā, nō te 1 Paengawhāwhā 2020 i mana ai.
Kua whakaae mai ngā tāngata e whai ake nei kia noho hei kaiwhakahere mō te poari o EIT mai i 1 Paengawhāwhā 2020:
Daryl Wehner – Heamana
Tracy Johnston – Heamana tuarua
Judene Edgar
Toni Grant
Charles Newton
Patrick Smith (Te Ātiawa, Ngāti Apa ki te Rā Tō, Rangitane, Ngāi Tahu)
“Ko te kopounga o tēnei o ngā Poari Kaiwhakahaere tētahi o ngā mahi nui hei waihanga i tētahi pūnaha ahumahinga piritahi, mauroa hoki,” ki tā Barry Jordan, te Heamana o te Poari Mātāmua.
“Ko te hiahia ia mā ēnei kopounga e taurite ai te taha whakahaere me te taha ki ngā hononga taketake ā-rohe, ā hapori hoki. E manawareka ana mātou i te momo o te tangata me ngā tirohanga rerekē kei ia poari, otirā ngā pūkenga me ngā tautōhito hei whakatinana i ngā hua pai mō ōna hapori anō.”
Ko te hiahia o te Education (Vocational Education and Training Reform) Amendment Act ko te iti rawa kia tokowhā, engari kia kaua e nui atu i te tokowaru ngā kaiwhakahaere mō te poari tuatahi o ia āpitihanga ITP, ā, ko tētahi haurua o aua kaiwhakahaere me mātua noho ki roto i te rohe e ratoa ana e taua āpitihanga.
E kī ana a Daryl Wehner te Heamana Poari, “Ko tā mātou he whakangungu ngātahi i ngā tāura kua rite ki te mahi, kua rite ki te ao, ā, he kawenga ahurei tā NMIT kia whai koha ia ki tēnei kaupapa ā-rohe, ā-motu.”
“Kei te anga whakamua kia ranga tonu te haere i raro i ngā ritenga o ēnei whakahoutanga e hāngai pū ana ō mātou hiahia. Kei te tautoko hoki mātou i tēnei aronga hou ki te ara a te tauira, ā, kei aronui atu hoki kia pūmau ai te whakahoatanga me te iwi, kia kaha ake ai te whai wāhi mai a ngā kaitukumahi, ngā ahumahu me te hapori.”
Hei ārahi haere anō i te nekehanga atu i te wairua o te whakataetae ki te āhua o te kōtuituinga tuku ratonga ki tēnā, ki tēnā rohe, kua whakataungia e te Poari Whakapūmau kia noho tētahi mema o Kaunihera NZIST hei kaiwhakahere ki ia poari āpitihanga ITP. Tērā e whiwhi ia poari tētahi tangata hei ‘kopounga whakawhiti’. Ka whakataungia ēnei ingoa i te marama o Paengawhāwhā.
Mō te kopou i ngā kaiwhakahaere i whāia e te Poari Whakapūmau i tā te Treasury anga kopounga kaiwhakahaere ki ngā poari o ngā kamupene Karauna. Neke atu i te 370 ngā tono i tae mai i waenga i te wā o te Kirihimete me te huringa o te Tau Hou.
Katoa ngā kopounga ki ngā poari āpitihanga i whakamanahia e te kaunihera NZIST i te 1 April 2020. Ka whakamanahia ngā mema o tēnei Kaunihera e te Minita Mātauranga, Hon Chris Hipkins, i mua i te mutunga o Poutūterangi.
Daryl Wehner – Heamana
He Kaiwhakahaere Matua tautōhito, he kaiārahi whakaumu hoki a Daryl, kua kitea whānuitia āna mahi whakatakoto rautaki me te whakahaere kia whai hua ai. I tēnei wā ko Daryl te Chief Financial Officer i Port Nelson Limited.
He Kaiwhakahaere hoki ia mō Trinity Lands Limited, ā, he mema hoki ia o Ngā Kaitiaki Pūtea o Ahitereiria me Aotearoa, me te New Zealand Institute of Directors. Kua mārenatia a Daryl ki a Andrea, ā, e rua ā rāua tamariki engari kua pakeke. E kaingākau ana a Daryl ki ngā mahi kori tinana, te oma me ngā tū whakataetae motokā tere.
Tracy Johnston – Heamana tuarua
He kaipakihi a Tracy kei Waiharakeke, he kaitohutohu mahi tūruhi hoki, e mahi ana i Aotearoa, i tāwāhi hoki. Kua whai tohu a Tracy mō ngā kaupapa mahi mākete, mahi whakahaere hoki, ā, kua aua atu i te 25 tau ia e mahi ana i roto i te rāngai tūruhi.
I tipu mai a Tracy i Waiharakeke tonu, ā, ka puta ka haere ki tāwahi mahi ai mō Tourism New Zealand, i mua i tā rāua hoki mai ki te wā kāinga i 2007, ko tana hoa tāne a Kevin. Mō ngā tau e waru, ko ia te Pou Whakahaere o Destination Marlborough me tana whakatairanga te rohe hei wāhi haere mō ngā manuhiri.
Nā Tracy rāua ko Kevin te māra wāina o Dayvinleigh Vineyard, i te Whārua o Wairau, kei reira e whakatipu ana i ngā kerepi whai tohu Pinot Noir. Atu i tā rāua ake pakihi, ko Tracy tētahi o ngā māngai ki te Poari o Marlborough Winegrowers. He mema hoki ia o te Institute of Directors, ā, kua noho ia ki te Kaunihera o Te Whare Wānanga o Te Tauihu o Te Waka a Māui hei kopounga ā-Minita ki ētahi Tarati arumoni-kore mō ngā tau 10 neke atu.
Judene Edgar
Ko Judene te Koromatua Tuarua o te Kaunihera o Whakatu, te Heamana o Nelson Tasman Regional Landfill Business Unit, te Heamana Tuarua o te Regional Transport Committee.
Ko ia hoki tētahi o ngā kaiwhakahaere mō Encompass Strategic Services Limited, te rōpū tohutohu mō te taha ki te mahere rautaki, te kaitiakitinga, te tuitui kaiwhaipānga, me te whakatipu pūtea, tētahi Tarahiti Network Tasman Trust, he Kaiwhakahaere hoki o NTT Investments Ltd.
Ko Judene tētahi kaikaunihera, hemana hoki o mua i Tasman District Council mai i 2007 ki 2016. Kua noho kaitiaki anō ia ki Nelson Airport Ltd, ki te Fundraising Institute of New Zealand, ki Habitat for Humanity (Nelson) Ltd ki Nelson Bays Primary Health hoki.
Antonina (Toni) Grant
He Kaikaute Rēhita a Toni, he mema hoki o te Institute of Directors, ā, he Kaiwhakahaere Ngaio. Ka oti i a ia te kaupapa kaitohutohu a te Institute of Directors i 2017/18.
Ko ngā tūranga kaitiaki kei te kawea e ia kei ētahi o ngā Kamupene Pupuri Rawa ā-iwi/Māori i Te Tauihu o te Waka, me ngā haumi i roto i ngā rāngai rawa o uta, o tai, pērā i te mahi ngahere, te hī ika me te ahu kaimoana. Ko Toni te Heamana o ngā komiti-whāiti e rua mō Te Tātari me te Whatitata (Rata Foundation me Central Districts Cricket) ā, he mema hoki ia o te Rōpū Tirotiro Kaitiakitanga mō ngā mahi whakahoutanga o Port Tarakohe.
Charles Newton
He whānui tonu ngā wheako o Charles i roto i te ao mātauranga, hei Tumuaki o Nayland Kāreti, hei Kaiwhakahaere Matua o te Nelson Marlborough Loop mō te ngahuru tau kua taha ake, hei kaitohutohu mātauranga e arotahi ana ki te āheinga matihiko me te ako mō te āpōpō.
He tautōhito hoki ia ki te ārahi i ngā kaupapa mahitahi whaihua ā, kua whai koha hoki ia ki te whakawhanake kaupapa here me te rautaki mātauranga ā-motu. Kua tata oti i a Charles tana huringa tuatahi hei mema o te Kaunihera NMIT, ā, kei te mōhio whānuitia ia hei tangata mōhio, whaiwhakaaro hoki. Kei te tino tautoko ia i te whakaaro kia kaha ake te piritahi o te pūnaha piritahi me te kotahi o te whakaaro kia pakari, kia tika te mātauranga ahumahinga o Aotearoa mō ngā rā ki tua.
Patrick Smith
Mai i te tau 2009 kua whakahaere a Patrick (Te Ātiawa, Ngāti Apa ki te Rā Tō, Rangitāne, Ngāi Tahu) i tāna ake pakihi pūmanawa tangata. I mua i tērā ko ia te Kaiwhakahaere Pūmanawa Tangata o te Rōpū o Sealord mō te 10 tau. Taketake mai ana ia i te rāngai ahuwhenua, ahumoana hoki, ā, i te roanga o tana ara mahi kua arotahi ia ki ngā kaupapa e whakapai ake ana i ngā hononga i waenga i te mātauranga me te ahumahi.
Ko āna mahi kaitiakitanga o mua hei Perihitini o Nelson Tasman Chamber of Commerce mō ngā tau e whitu, hei kopounga ā-minita ki te Poari Hauora ā-Rohe o Whakatū me Waiharakeke.