Te whakapiki i te mana o te mātauranga ahumahinga

News

Te whakapiki i te mana o te mātauranga ahumahinga

Whiringa-ā-rangi 30, 2020 | 3 min read

I roto i tēnei ao hurihuri, he mea whai tikanga kia rite kia takatū ai tātou mō ngā rā ki tua. Nā te urutā COVID-19 he mea whakahirahira tonu tēnei āhuatanga, inā rā te maha o ngā tāngata kua tahuri kia whakangungua anō.

E ngāwari ai mā ngā ākonga ki te hono atu ki ngā kōrero e hiahiatia ana, ngā whakamārama hoki mō ngā whakaakoranga ake kei ngā āpitihanga me ngā ITO whakawhitinga, kua whakahoutia e mātou tā mātou pae hei āwhina i tērā hiahia. E hāngai ana tēnei whakahoutanga ki te kaupapa whakatairanga hou a TEC mō te mātauranga ahumahinga me te whakangungu.

I tae ā-tinana atu te Pirimia Hōnore Jacinda Ardern rāua ko te Minita Mātauranga a Chris Hipkins ki te wharemahi a Mulcahy Engineering and Fabrication i Tāmaki Makaurau ki te whakanui i te whakaterenga o te kaupapa whakatairanga a TEC mō te mātauranga ahumahinga. Ko tāna he whakakite, he tīpako hoki i te whānuitanga o ngā kōwhiringa mātauranga aumahinga e wātea ana ki ngā momo tāngata katoa. Ka taea e koe te pānui i tā te Kāwanatanga putanga pāpāho i konei .

Ko tā te kaupapa whakatairanga he whakapiki i te mana o te mātauranga ahumahinga, he whai hoki kia kaha haere te whai wāhitanga.

Ko te hunga e arohia ana e te kaupapa whakatairanga ko:

  • Te hunga whakarere kura
  • Ngā ākonga pakeke
  • Ngā Māori, Pasifika, ākonga whaikaha me ngā wāhine
  • Ngā kaitukumahi
  • Ngā kaiwhakaaweawe (Ngā mātua, Kaiako, me ngā Kaitohutohu Ara Mahi)

Ki tā Stephen Town, te Kaiwhakahaere Matua o Te Pūkenga, “He mea whakongaonga tēnei kaupapa whakatairanga, ā, e koa ana mātou ki te tautoko i tēnei kaupapa a TEC. Kua tae ki te wā kia hāpaitia te mana o te mātauranga ahumahinga i roto i ā mātou hapori. Arā kē atu ngā huarahi ka taea e ngā momo tāngata, kia whai wāhi mai ki te mātauranga ahumahinga, ahakoa, kei te panoni mahi koe, kei te kimi i tētahi pia mēnā he kaitukumahi koe, mehemea he ākonga whakarere kura koe, ā, kei rapu huarahi hei whai atu māu i muri i te kura.

Ko tā te kaupapa whakatairanga he hāpai i tētahi matapaki ā-motu e pā ana ki te whaihua o te mātauranga ahumahinga me te whakangungu, ā, ka haere te kaupapa nei mai i tēnei wā, ā, tae atu ki te tau 2023 rā anō.