Kua kopoua te Poari Kaiwhakahaere Āpitihanga o EIT

Ko ngā tāngata kua whakaae mai kia noho rātou hei kaiwhakahaere ki te poari o EIT.

Hilton Collier standing in front of sign

I te rā nei e pānuitia ana e te Poari Mātāmua o New Zealand Institute of Skills and Technology (te Poari Mātāmua) ngā kaiwhakahaere mō ngā poari o ngā Pūtahi Āpitihanga, Kuratini hoki (ITP), ā, nō te 1 Paengawhāwhā 2020 i mana ai.

Kua whakaae mai ngā tāngata e whai ake nei kia noho hei kaiwhakahere mō te poari o EIT mai i 1 April 2020:

Hilton Collier (Ngāti Porou) – Heamana

Chrissie Hape (Ngāti Kahungunu, Ngāi Tahu, me Moriori) – Heamana Tuarua

Ross McKelvie

Geraldine Travers

“Ko te kopounga o tēnei o ngā Poari Kaiwhakahaere tētahi o ngā mahi nui hei waihanga i tētahi pūnaha ahumahinga piritahi, mauroa hoki,” ki tā Barry Jordan, te Heamana o te Poari Mātāmua.

“Ko te hiahia ia mā ēnei kopounga e taurite ai te taha whakahaere me te taha ki ngā hononga taketake ā-rohe, ā hapori hoki.  E manawareka ana mātou i te momo o te tangata me ngā tirohanga rerekē kei ia poari, otirā ngā pūkenga me ngā tautōhito hei whakatinana i ngā hua pai mō ōna hapori anō.”

Ko te hiahia o te Education (Vocational Education and Training Reform) Amendment Act ko te iti rawa kia tokowhā, engari kia kaua e nui atu i te tokowaru ngā kaiwhakahaere mō te poari tuatahi o ia āpitihanga ITP, ā, ko tētahi haurua o aua kaiwhakahaere me mātua noho ki roto i te rohe e ratoa ana e taua āpitihanga. 

E ai ki te Heamana Poari a Hilton Collier, “Inā ke te hora o EIT i tēnei takiwā i rāwhiti roa, mai i Tamaki-nui-a-Rua, ā, tae atu ki Te Whanga-o-Kena, e anga whakamua te titiro, kia tipu tonu, kia puāwai tonu te EIT kia mau tonu ngā hononga, me tōna āhua i roto i tēnei rohe, arā, hei pūtahi whaimana.”

“E ngākaunui ana ahau ki te whakatutuki i ngā hiahia o tēnei whakatipuranga me ō ngā whakatipuranga o muri. Mā te tuku kaupapa whakangungu i roto i te mahi i te taha hoki o ngā whakangungu te mahi, me te whāngai i tā tātou ohumahi ki ngā pūkenga me ngā mōhiotanga e tika ana mō ngā ahumahi hou, ka taea e tātou ngā hua nui ā-pāpori, ā-ōhanga hoki mō ngā rohe o Te Matau-a-Māui, me te Tai Rāwhiti.”

Hei ārahi haere anō i te nekehanga atu i te wairua o te whakataetae ki te āhua o te kōtuituinga tuku ratonga ki tēnā, ki tēnā rohe, kua whakataungia e te Poari Whakapūmau kia noho tētahi mema o Kaunihera NZIST hei kaiwhakahaere ki ia poari āpitihanga ITP.  Tērā e whiwhi ia poari tētahi tangata hei ‘kopounga whakawhiti’. Ka whakataungia ēnei ingoa i te marama o Paengawhāwhā.

Mō te kopou i ngā kaiwhakahaere i whāia e te Poari Whakapūmau i tā te Treasury anga kopounga kaiwhakahaere ki ngā poari o ngā kamupene Karauna. Neke atu i te 370 ngā tono i tae mai i waenga i te wā o te Kirihimete me te huringa o te Tau Hou.

Katoa ngā kopounga ki ngā poari āpitihanga i whakamanahia e te kaunihera NZIST i te 1 April 2020. Ka whakamanahia ngā mema o tēnei Kaunihera e te Minita Mātauranga, Hon Chris Hipkins, i mua i te mutunga o Poutūterangi.

Hilton Collier – Heamana

He tāura a Hilton mai i Lincoln College, ā, ko tana mahi matua he Kaiwhakahaere Pakihi Ahuwhenua. Ko tana ara mahi e hora ana mai i te Tai Rāwhiti ki Te Matau ā-Māui, kei reira ia e mahi ana me te tohutohu i te tangata mō te taha rautaki, taha ārahi tangata hoki i roto i ngā wāhi katoa o te pakihi ahuwhenua. E kaingākau ana ki te whakangungu me te whakapiki pūkenga, te rangahau, te taha arumoni, kaupapa-here tūmatanui me te taha ki ngā ture.

Ko ia tētahi o ngā tāngata whaipānga tuatahi o Agri-business Agfirst, ā, i tēnei wā ko ia tonu te kaiārahi o Pakihiroa Farms Limited me Ngāti Pahauwera Farms, ā, kei te kawea anō hoki e ia ētāhi atu tūranga kaitiaki.

E tipu e rea mō ngā rā o tōu ao, (Grow up and serve your generation) – Tā Apirana Ngata

Christina Hape – Heamana Tuarua

He uri a Chrissie o Ngāti Kahungunu, Ngāi Tahu, me te Moriori, ā, ko ia te Kaiwhakahaere Matua o Ngāti Kahungunu Iwi Inc, ā, ko tāna he ārahi i te whakahaerenga o te tari a te Iwi me te whakatutuki i te Mahere ā-Tau.

Neke atu i 35 tau ia e mahi ana i roto i te rāngai kāwanatanga, rāngai hapori hoki, ā, e whā tau ia e mahi ana i Ngāti Kahungunu Iwi. I roto i tana ara mahi ko tāna i tino arotahi ai ko te waihanga, me te whakakaha i ngā whakahoatanga i waenga i te kāwanatanga, te hapori me te Iwi kia pai ake ngā hua hauora, mātauranga, pāpori, oranga hoki me te whai ki te whakaōrite i te whiwhi a ngā whānau me ngā hapori katoa.

Nā Chrissie anō i whakahaere te whakatūranga o Takitimu Seafoods Limited Partnership me tana noho hei Kaiwhakahaere Matua mō ngā marama e waru. Nō nā tata nei i kopoua ia hei Kaiwhakahaere o Health HB (Hawkes Bay Primary Health Organisation) i muri i tana noho mō te 3 tau hei Tarahiti mō Te Matau a Maui Health Trust.

I mahi a Chrissie i te tari a te Iwi mō te 3 tau hei Senior Advisor Iwi Partnerships e ārahi ana i ngā kaupapa kia whakahokia mai ngā tamariki i raro i te mana tiaki a te karauna ki ō rātou ake whānau, kia whakapakari i ngā whānau i roto i ngā rāngai pāpori, hauora hoki.

Ross McKelvie

I whānau mai a Ross i Te Whanganui a Tara, ā, i tōna taiohinga ka hūnuku ia ki Ahuriri. Ko āna pakihi o mua ki tāna ake whare tango whakaahua, ko Metro Rentals and Buses, me ngā Pūnaha Utu pakihi me ngā ratonga ā-pūtea. Nā rāua ko tāna hoa wahine a Barbara, tētahi pakihi tūruhi mai ko NZ Unlimited.

Kua noho a Ross hei kopounga nā te Minita ki te Kaunihera EIT mō ngā tau 15, ā, mō ngā tau e iwa kua hipa kua noho ia hei heamana mō te komiti Tātari Kaute. He mema a Ross o te Napier Rotary Club, ā, e ngākaunui ana ia ki te Motorsport (te whakataetae me te mātaki), te tāpoi haere i Aotearoa ki tāwahi hoki me te whai wā ki ana tamariki, mokopuna hoki.

Geraldine Travers

MNZM JP

Whai muri i tana ara mahi roa tonu i roto i ngā kura tuarua, e 24 tau hei Tumuaki i ngā kura tuarua e rua, i whakawhiwhia a Geraldine ki ētahi tohu mana nui: pērā i te Woolf Fisher Travelling Fellowship, te tohu mō te National Excellence in Leadership mai i te NEITA Foundation, me te MNZM mō āna mahi i te ao mātauranga.

Nō 2016 i kōwhiria a Geraldine ki te Hastings District Council, ā, i kōwhiria anō i 2019, ā, i tēnei wā ko ia te heamana o te Komiti  Whakahaerenga me te Aroturuki. Nō te tau 2008 i kopoua ia e te Minita ki te Kaunihera EIT, ā, nō 2018, ka noho ko ia te Heamana o te Kaunihera.