I te whai wāhi te hunga i te hui ki tētahi awheawhe nā Te Pūkenga i whakarite. Ko tēnei awheawhe te mea tuatahi pēnei, ā, he taumata tuatahi hira tēnei, i huihui ai ngā kaiarataki mātāmua i ngā Whakahaere Whakangungu Ahumahi Tauwhirowhiro (ITO) me Te Pūkenga kia piki kē atu tō rātou māramatanga ki te wā tauwhirowhiro. He mea hoki e mārama ake ai te katoa me pēhea te hoahoa i te whakawhiti i te kaupapa whakangungu mai i ngā Whakahaere Whakangungu ki roto i Te Pūkenga kia rere rōnaki mō ngā ākonga, mō ngā kaitukumahi me te ahumahi.
Ka tauwhirowhiro ngā kaupapa whakangungu me te kaupapa whakarite paerewa a ngā Whakahaere Whakangungu Ahumahi i roto i ngā tau e rua kei mua i te aroaro, kia oti katoa i mua i te Tīhema 2022, e ai ki tā te Ture. Te āhua nei ka tauwhiro hoki ētahi o ngā mahi whakarite whakangungu ki Te Pūkenga, ko ētahi ka tauwhirowhiro ki ngā whakahaere motuhake mō te whakangungu (PTE) me ngā wānanga. Ka whakawhiti ngā mahi whakarite paerewa ki ngā Kaunihera Whakapakari Kāhui Kaimahi (WDC).
"E tū tahi ana tātou i roto i tēnei hononga, i runga i te whakapono ki ngā ākonga. Ahakoa he āhua rerekē ō tātou reo ināianei, hei te mahi tahitanga ka kitea he reo kotahi, he kaupapa kotahi mō te katoa, e tuia ai ō tātou ao, e noho ai tātou hei whānau kotahi. Ka whakatere tahi tātou i tō tātou ao hou," te kī a Merran Davis, te kaiwhakahaere Mātāmua o Te Pūkenga, mō te whakaumu me te tauwhirowhiro.
"E tino whakapono ana au, ki te mahi tātou i ngā mea tika, ka puta mai he hua mō te katoa. Ki taku whakaaro, me tino iti te whakararunga o te tauwhirowhiro mō te kaupapa whakarite whakangungu mō ā tātou kaituku mahi, me ā tātou ākonga, tuarua, me hanga mahere hei whakapiki tahi i te pai o ngā mahi," te kī a Merran.
Ko tēnei awheawhe te tuatahi o ngā kōrero maha ka tū i waenga i ngā Toihau o ngā Whakahaere Whakangungu me te Pūkenga. I inoitia ngā tāngata i te hui kia mahi tahi mō ētahi kaupapa matua, tae atu ki ēnei: He pēhea te āhua o te tauwhirowhiro pai o te whakarite whakangungu?
Kua whakapiria mai a Fiona Kingsford, te Toihau o Competenz, kia mahi tahi me Te Pūkenga i tētahi tūnga harangotengote kia whakawhanaketia he mahere whakatinana whai take, e rere rōnaki ai te whakawhitinga o te whakangungu ahumahi, me te whakaū i te pai o te tautoko mō ngā ākonga me ngā kaitukumahi.
"Nui atu taku hari mō te pai o ngā hua o te awheawhe i tēnei rā. Me mahi tahi tātou ki te tautohu i ngā taumata hei kakenga mō tētahi tauwhirowhiro pai. Me noho tō tātou aronga ki runga i te whakaroanga o ngā akoranga me ngā whakangungu ahumahi ki roto i tētahi haerenga mō ngā rā katoa o te tangata i te ao, e huia ai ngā painga whakangungu i te whakahaere, i te ipurangi, i te wāhi mahi rānei, i runga i ngā hiahia o te ākonga, kia puta ai he pikinga pūkenga mō Aotearoa," ki tā Fiona.
"He tini huringa nui tēnei mō te rāngai, nā reira he tika kia whakatere tahi tātou i ngā ara hou nei. Ki taku mōhio he hīkoinga tuatahi ātaahua tēnei, ki tērā ahunga."
Kua mahi tahi ngā tāngata o te awheawhe kia ea ngā pātai maha, kia ako te katoa, nā ngā takoha whakaaro o ōna hoa, me te anga atu ki te whakairo reo hou, kaupapa hou. I te tuatahi i haere tētahi wāhanga rōpū iti mō te whakarite whakangungu – i inoitia ngā tāngata i te hui kia pāhekoheko mō tōna āhua tūturu, me ngā mahi e tutuki ai. I muri, i whakauru ngā tāngata i te hui ki te ao whakaaro o tētahi Toihau Whakahaere Whakangungu me te Tumu Whakarae o Te Pūkenga kia mōhoi rātou ki ngā mea e tika ana kia aronuitia kia tika ai te tauwhirowhiro o te kaupapa whakarite whakangungu.
Ki a Toby Beaglehole, kua tohua inakuanei hei Toihau mō BCITO, (ka tīmata hei te 2021), he whai take te awheawhe. "He mea whai take te noho tahi, te kōrero tahi mō te tauwhirowhiro, me tōna pūtake. Nui atu taku hari i tae mai te katoa o ngā Whakahaere Whakangungu Ahumahi Tauwhirowhiro ki te hui, i te taha o Te Pūkenga. Nā te hui nei i piki ake ai te māramatanga o Te Pūkenga ki te ātaahua o ngā mahi ka kitea i ngā wāhi mahi, me te tūnga hira o ngā Whakahaere nei ki te whakarite tukanga e huri ai te noho a te tangata i tōna ao. He mea ātaahua ki ahau te wairua o te hui, te wātea o ngā kōrero ki te katoa mō ngā whāinga wāhi me ngā anganga ki ngā huringa kei mua i te aroaro. E anga ana taku titiro ki te tini o ngā kōrerorero ki Te Pūkenga i a tātou e kawe whakamua nei i ā tātou mahere tauwhirowhiro.
Arā atu ngā huihuinga i waenga i ngā Whakahaere Whakangungu Ahumahi Tauwhirowhiro e whakaritea ana, hei whakanikoniko i ngā tāreinga hou tae mai ki tēnei rā.