Kua rite ētahi whakahaere whakangungu ki te whakawhiti

Kei te tere ake ngā mahi hei whakawhiti i ngā whakahaere whakangungu ahumahi

Employer and apprentice in shipyard talking 400x200

Kei te tere ake ngā mahi e pā ana ki ngā ngā whakahaere whakangungu ahumahi whakawhitinga (ngā TITO). E whā ngā TITO kua waitohu Reta Whakamaunga kia whakawhitia te whakahaerenga o ngā mahi whakangungu wāhi-mahi ki Te Pūkenga i mua i te mutunga o te tau 2021. Ko aua whakahaere ko Competenz ko Connexis, te BCITO me te MITO.

Kua waitohua ngā whakaaetanga whakahoatanga me Service IQ me The Skills Organisation hoki. Hei tohu mai ēnei whakaaetanga i te āhua o te mahitahi a ngā TITO me Te Pūkenga ki te whakamahere i tā rāua ara whakawhiti.

Kua tata oti ngā mahi tūhurahura mō Competenz, Connexis me te BCITO i te taha o Te Pūkenga kia mārama ai te tauira whakahaere a ngā TITO, me pēhea ēnei e whakawhitia. Ka pūrongotia ngā kitenga tuatahi ki ngā kaiarataki o Te Pūkenga i tēnei marama.

Kei te huitahi a Fiona Kingsford – Kaiarataki Āheinga rāua ko David Newton – Kaiwhakahaere Kaupapa ki ia TITO ki te matapaki i āna whakamaunga whakawhiti me te wātaka mō ērā i roto i ngā wiki tata kei te tū mai.

“Ki ōku whakaaro he tika kia mihia ngā mahi nunui a ngā TITO kia tutuki pai te whakawhitinga o te whakahaere i ngā mahi whakangungu ki Te Pūkenga me ngā mahi pūnaha tohu mātauranga ki ngā Kaunihera Whanaketanga Ohumahi,” tā Fiona.

I Te Whanganui a Tara i te 10 o Pepuere, i whai wāhi ngā māngai mō ia TITO ki tētahi hui awheawhe kia tirohia ā rātou tauira whakarato. Nā tēnei i kohia e te rōpū ngā painga, arā, ngā mea whaihua kia puritia i roto i te wā whakawhiti, pērā i te ngāwari me te whakahāngai whakaakoranga hei tautoko i ngā hiahia whāiti wāhimahi, ngā mahi hei hāpai i ngā ākonga kia kauneke haere tonu, tae atu ki ngā hononga ahumahi kaha me te āheinga i roto i te hapori pūmanawa TITO.

“I rangona ngā mihi a te rōpū mō tā rātou whai wāhi ki te kōrero mō te tino whaihua o ā rātou tauira pakihi o tēnei wā,” te kī ana a Fiona.

“E mōhio tonu ana rātou kua takoto tētahi tukanga hei hopu i ngā kahanga o ā rātou tauira kia puritia i roto i te pūnaha hou.”