He rongo kōrero hou mai i Te Pūkenga

Learn with purpose hero
Hepetema 2020

Kia ora 

Ngā mihi nui ki a koutou katoa

Tō mātou ingoa hou

I pupuritia tēnei pānui me āna pārongo katoa, kia taea ai te tuku i ngā rongo kōrero hou rawa ki a koutou. Arā mō Te Pūkenga! I te Tūrei Hepetema 29 i pānuitia e te Minita Mātauranga, Hon Chris Hipkins, tō mātou ingoa hou. Manawareka ana mātou ko Te Pūkenga tō mātou ingoa ināianei. Koia hei whakakapi i tō mātou ingoa mahi o mua. Hāunga tō mātou ingoa hou, kua whai tētahi tohu hou anō hoki.  

Ka pānuitia tā mātou ingoa hou e te Minita Mātauranga, Chris Hipkins i Kirikiriroa

Ki au, e tohu ana tō mātou ingoa hou i ētahi mea. Tuatahi, mā te tapa ingoa ki tētahi mea, ka whai tinana ia, ka whai hau ora hoki. Kua tukua ki Te Pūkenga te mana whakahaere hei kawe i tētahi kaupapa whakaumu, whakaongaonga nei. Ki au nei, mā te whai ingoa tūturu ka whai mana hoki mātou kia tere ai te kōkiri whakamua.

Mā te ingoa hou nei e whakakotahi i a mātou hei kaituku ā-motu kotahi e tuku ana i te mātauranga ahumahinga me te whakangungu. He rawe hoki te kite i te tokomaha o ngā kaimahi me ngā ākonga mai i tō mātou kōtuinga puta noa i Aotearoa e mātaki ana i te pānuitanga o te ingoa hou i tērā Tūrei.

E kōrero ana a Minita Hipkins me ētahi ākonga i te hui pānuitanga ingoa

Ko te mea nui, ko te whakapūmau i tētahi ingoa ki tētahi hanga hou, pēnei rawa tōna rahi, tōna whānui, kua taea e tō mātou Kaunihera te āta whakaaro ko hea te wāhi pai e arotahi ai, e whakaawe ai. Hei roto i ngā tau kei te tū mai, ka tū Te Pūkenga hei pūtahi ā-motu e toro ana ki ngā rohe, ko āna ākonga kei te pūtake tonu, ā, ka mau tonu ko tōna aronga ki te whakatutuki i te ōritenga mā te Māori. 

Te Pūkenga word mark

He mea whakaawe tō mātou taukiri hou i te pū o te harakeke, ā, koia tonu te wāhanga kaha rawa, te pūtake o ngā aho katoa. Ahakoa he maha ngā whenu o te kōtuinga o Te Pūkenga, kia kotahi tātou ka kaha kē atu. Mā tēnei kaha takitini tātou e tautoko, e hāpai tētahi i tētahi. Koia nei te pūtake e tipu ai tātou, ā, ka puāwai noa.   

Te mahitahi me te hoahoa tahi kia angitu ai

Ko Te Pūkenga te kaituku mātauranga matua nui rawa o Aotearoa, ā, ko te tuangahuru mā rima o ngā pūtahi mātauranga matua nui rawa o te ao, me ōna 240,000 ākonga, 10-11,000 kaimahi hoki.

He mea tino whaitake ki tō mātou angitu te whakarite wā ki te kōrero me te whakarongo hoki ki ngā kaimahi, ngā ākonga, ō mātou rōpū whakahoatanga me ngā kaiwhaipānga, ā, he pērā tonu te whānui o te mahitahi i tēnei wā tonu.

Kua tīmata kē māua ko Murray Strong. te Heamana Kaunihera, i tā māua haerenga ā-motu, ā, i hikina tēnei kaupapa e rua ngā wā nā runga i ngā here o te urutā COVID-19. Kua toro kē a Murray i ngā āpitihanga i mua, engari ko au, kātahi anō au ka whai. Ka rawe tonu ki au te toro i ia kura, ki te tūtaki i ngā kaimahi me ngā ākonga. Kei tēnā, kei tēnā rohe tōna ake āhua, heoi kotahi tonu te mea ōrite, ko te ngākaunui o ngā kaimahi, ki te mahi me ā rātou ākonga, he pērā hoki ngā ākonga, he pai, he māhaki, ā, kei te ū tonu ki te ara kei te whāia, hei ara mahi hei ara ako mō ake tonu.

Ko tō mātou tīma Ko Te Ākonga te Pūtake koia tērā e whakahaere ana i tētahi o ngā ara mahi whakaumu, nāna tētahi momo whakaaturanga anō i kōkiri, ā, hei ngā marama e rua kei te tū mai, ka toro atu te tīma ki ia rohe ki te whakawhiti kōrero me ngā kaimahi, ngā ākonga, whānau me ngā hapori o ngā āpitihanga me ngā ITO whakawhiti.

E kawea ana e rātou tētahi mahi rangahau whaitake e tirotiro i ngā āhuatanga e ārai ana, e hāpai ana hoki i te ākonga. Kua whai whakaaetanga motika te tīma nei mō tēnei mahi rangahau, ā, ka waihanga he mahere ara ako mō te ākonga, ka kohikohi hoki he raraunga, he kōrero hei taonga whakaaro mō tā mātou tauira whakahaere – Tā Te Pūkenga tauira whakaumu.  

Kua whai tautoko te tīma nei i te mahi ngātahi me te te huinga tāngata e aro ana ki te hoahoa akoranga mō te ākonga, arā tētahi tīma me ōna māngai e 38 mai i ngā āpitihanga me ngā ITO whakawhiti, he mea whaihua anō ki ngā mahi whakamahere i tēnei kaupapa ā-motu.

Mō te whakanoho Ko te Ākonga te Pūtake, ka aronui Te Pūkenga ki ngā hiahia o te ākonga, me ērā ākonga kua kitea kāore e ōrite ana te whiwhi. He kaupapa mahitahi te tukanga hoahoa, kia whai wāhi mai ngā ākonga, ngā whakahoatanga me ngā kaiwhaipānga matua. He mea whakahaere te hoahoa ā-tuihono, i ngā hui kānohi-ki-te-kanohi, me ngā rōpū tirohanga whāiti hoki.

Ko te tūmanako e pārekareka ana ki a koutou te pānui i ngā kōrero mō mahi a Te Pūkenga – ehara ko ngā mahi anake, engari anō mō te tikanga me te tukanga e whāia ana e mātou.

Ngā mihi 

Stephen Town 
Kaiwhakahaere Mātāmua